It-Turiżmu f’Malta

It-turiżmu huwa wieħed mis-setturi l-aktar importanti għall-ekonomija Maltija. Kull sena, Malta tilqa’ numru kbir ta’ turisti minn diversi pajjiżi. Minkejja li pajjiżna huwa żgħir, għandu ħafna x’joffri, fosthom bajjiet sbieħ, klima Mediterranja, storja rikka u kultura interessanti. Waħda mir-raġunijiet ewlenin għaliex it-uristi jagħżlu li jżuru Malta hija l-klima. Is-sjuf huma sħan u xemxin, u għalhekk ħafna turisti jiġu biex igawdu l-baħar u l-bajjiet. Postijiet bħall-Mellieħa, Għajn Tuffieħa u l-Blue Lagoon f’Kemmuna huma popolari ħafna, speċjalment matul ix-xhur tas-sajf. Malta hija magħrufa wkoll għall-istorja tagħha. Il-Belt Valletta, l-Imdina u t-Tliet Ibliet huma fost il-postijiet li jiġbdu ħafna viżitaturi. F’dawn il-lokalitajiet wieħed jista’ jara bini storiku, knejjes, fortifikazzjonijiet u mużewijiet. It-tempji preistoriċi u siti storiċi oħra juru kemm Malta għandha wirt antik u importanti.

Benefiċċji u problemi

It-turiżmu jġib miegħu ħafna benefiċċji. Joħloq opportunitajiet ta’ xogħol f’lukandi, ristoranti, ħwienet, trasport u servizzi oħra. Barra minn hekk, it-turisti jonfqu l-flus f’Malta u b’hekk jgħinu lill-ekonomija tal-pajjiż. Skont l-Uffiċċju Nazzjonali tal-Istatistika, dak li jissejjaħn NSO, matul l-2025 madwar 4.02 miljun turist żaru Malta u bejniethom nefqu madwar €3.9 biljun. Dan ifisser medja ta’ madwar €971 għal kull turist. Dawn il-flus jintefqu fost oħrajn fuq lukandi u akkomodazzjoni, ristoranti, trasport, xiri, divertiment u attrazzjonijiet turistiċi.

Madankollu, it-turiżmu jista’ joħloq ukoll ċerti problemi. Meta jkun hemm ħafna turisti f’daqqa, jistgħu jiżdiedu t-traffiku, l-iskart u l-iffullar f’postijiet popolari. Għalhekk, huwa importanti li Malta tippromwovi turiżmu sostenibbli li jirrispetta l-ambjent, il-wirt storiku u l-komunitajiet lokali. Fis-sajf tal-2026, kien hemm diversi każijiet fil-midja dwar problemi marbuta ma’ ċerti turisti. Importanti ngħidu li dawn huma każijiet ta’ xi turisti, mhux tat-turisti kollha. Fis-Swieqi kien hemm każ fejn turisti dehru jitfgħu fliexken fit-triq u jagħmlu storbju, u 12-il persuna ġew immultati mill-pulizija. Fl-istess lokalità ġew irrappurtati problemi bħal rimettar u awrina fit-toroq, vandaliżmu fuq karozzi jew propjetà privata, skart u turisti fis-sakra. F’Tas-Sliema residenti lmentaw dwar gruppi fis-sakra ġejjin minn party boats, mużika għolja, parties tard billejl, skart u vandaliżmu. F’Pembroke, f’Awwissu grupp ta’ turisti daħlu f’sit ta’ kostruzzjoni, telgħu fuq il-bejt u wieħed minnhom deher jagħmel l-awrina minn fuq il-bini. Jekk nistgħu nsejħulhom kollox lil dawn it-turisti, żgur ma nistgħux insejħulhom turisti ta’ kwalità.

Low cost

Meta nisimgħu l-espressjoni “low-cost tourists” f’Malta, normalment inkunu qed nirreferu għal turisti li jippruvaw jagħmlu l-vaganza tagħhom b’baġit baxx. Dawn jistgħu jagħżlu titjiriet irħas, hostels jew akkomodazzjoni low-cost, ikel irħis u attivitajiet b’xejn jew bi prezz baxx. Għalhekk, bħala medja jistgħu jonfqu inqas flus f’Malta minn turisti li joqogħdu f’lukandi aktar għaljin jew jagħmlu aktar attivitajiet bi ħlas. Madankollu, “low-cost tourist” ma jfissirx turist ħażin. Turist li jonfoq ftit xorta jista’ jgħin lin-negozji lokali u jirrispetta l-pajjiż. Biss għandi l-impressjoni li ħafna mill-problemi li smajna bihom matul is-sajf li għadda, kienu ġejjin minn din il-faxxa ta’ turisti. Din hija impressjoni tiegħi u għandi mnejn inkun sejjer żbaljat.

Turiżmu sostenibbli

Turiżmu sostenibbli jfisser turiżmu li jsir b’mod li jħares l-ambjent, jirrispetta l-kultura u jgħin lin-nies tal-lokal, filwaqt li xorta jippermetti lit-turisti jgawdu l-post. Pereżempju, f’Malta turiżmu sostenibbli jista’ jfisser li t-turisti jużaw it-trasport pubbliku, ma jħallux skart fil-bajjiet, jiffrankaw l-ilma u l-elettriku, u jżuru negozji u ristoranti lokali. Fi kliem sempliċi, ingawdu pajjiż mingħajr ma nagħmlu ħsara lill-ambjent u lill-ħajja tan-nies li jgħixu fih.

Skont l-aħħar statistika disponibbli tal-NSO, l-ikbar grupp ta’ turisti li jiġu Malta għandu bejn 25 u 44 sena. Pereżempju, f’Ġunju 2026, 37.2% tat-turisti kienu f’din il-faxxa ta’ età, filwaqt li 28.9% kellhom bejn 45 u 64 sena. Fis-sajf, però, jiżdiedu ħafna ż-żgħażagħ. Pereżempju f’Lulju 2025, turisti li kellhom anqas minn 24 sena kien l-akbar grupp, b’36.1% tat-turisti kollha. Ma ninsewx li Malta hija mfittxija ħafna għall-iskejjel lin jgħallmu l-ilsien Ingliż lill-barranin. Kull sena jiġu Malta bejn 75,000 u 80,000 student barrani biex jistudjaw l-Ingliż. Dawn l-istudenti huma parti importanti mit-turiżmu edukattiv u jgħinu lill-ekonomija billi jonfqu l-flus fuq akkomodazzjoni, ikel, trasport u divertiment. Biss tajjeb noqgħodu attenti, il-flus ma humiex kollox, huma importanti imma wieħed tajjeb jara ftit il bogħod minn imnieħru u jkejjel l-impatt ta’ dawn it-turisti kollha, jekk huwiex impatt negattiv jew pożittiv. Il-flus mhux kollox, importnati imma jistgħu jirrenduk fi skjav. Min għandu moħħ biex jifhem jifhem!

Għalhekk waħda mill-akbar isfidi għat-turiżmu Malti hija li nattiraw turiżmu ta’ kwalità u mhux niffukaw biss fuq numru kbir ta’ viżitaturi. L-għan għandu jkun li t-turiżmu jagħti benefiċċju ekonomiku lill-pajjiż filwaqt li jirrispetta l-ambjent u lir-residenti u dk kollu li huwa Malti.

Fr Reno Muscat

Dan l-artiklu deher f'In-Nazzjon - 26 ta' Settembru 2026

Il-ħobża Maltija

 

Fost il-ħafna ikel tipiku Malti, insibu l-ħobż Malti. Tista’ tgħid li kull pajjiż u kull kultura għandha l-ħobż tagħha. L-istess nistgħu ngħidu għal pajjiżna. Il-ħobża Maltija hija aktar minn sempliċi ikel; hija simbolu tal-kultura u l-identità nazzjonali tagħna. Tiddistingwi ruħha bil-qoxra aktarx iebsa u tqarmeċ u l-qalba, li tissejjaħ ukoll lbieba, li tkun ratba. Għidli min ma jħobbx kisra ħobż tal-Malti biż-żejt u l-kunserva? Kultant nara hobż mormi u ngħid id-dritt inħoss qalbi tingħafas meta niftakar kemm ħin ikun għadda l-furnar fis-sħana tal-forn biex iwassal ħobża friska u mbagħad ikun hemm min jarmiha.

Il-proċess tal-ħobż Malti 

Il-proċess tal-ħobża Maltija huwa wieħed twil u jiddependi ħafna wkoll mit-temp. Il-proċess jibda mill-jum ta’ qabel issir il-furnata. X’jiġifieri? Il-ħobża Maltija, meta tkun maħduma bil-proċess tradizzjonali, ikollha dik li tissejjaħ tinsila, il-ħmira li tgħolli l-għaġna kollha. It-tinsila kienet tkun biċċa għaġina li titħalla mill-jum ta’ qabel biex din tiqras u ssir ħmira. Il-kelma li jużaw il-furnara hija li t-tinsila titlewwet. Din it-tinsila sservi biex issir il-fermentazzjoni biex il-ħobż jogħla u jieħu togħma rikka li fih.

Il-ħobża Maltija ma fihiex wisq ingredejenti, fiha biss proċess twil biex jagħmilha unika. Il-proċess jibda billi jitħalltu d-dqiq, l-ilma, il-melħ mill-oħxon u l-ħmira. Il-kwantità u l-ħin ta' mistrieħ tal-għaġina huma sigrieti ewlenin ta’ kull furnar. Kollox jitħallat fil-maġna u wara li l-għaġna tkun lesta tinqala’ mill-makna u tintefa’ f’tilar tal-injam. Hemm titħalla toqgħod imma titqalleb xi darbtejn. Imbagħad din l-għaġina tittieħed fil-mejjilla, li huwa banju kbir tal-injam biex tkompli togħla sakemm tibda titqatta’ sabiex titgerbeb f’ħobż.

Tieħu l-forma

Wara dan il-proċess ikun wasal il-waqt li l-għaġna titqatta’ tal-qies, tintiżen u tibda titkebbeb f’ħobż. Il-ħobża titgerbeb u ssirilha l-għoqda u titpassat, jiġfieri titpoġġa f’tilari. Tajjeb ngħidu li kull tip ta’ ħobż Malti għandu l-istess ingredjenti u l-istess proċess, imma l-forma tista’ tibdel anke xi ftit it-togħma.

Il-ħobża Maltija tista’ tkun “baxxa” jew “għolja”, id-differenza hija fil-mod ta’ kif wara li titgerbeb titpassat fit-tilar. Il-ħobża baxxa, tiġi mpoġġija fit-tilar bl-għoqda il fuq. Fil-fatt xi furnara jixħtu raxxa ġunġlien fit-tilar u dan jeħel ma’ wiċċ il-ħobża. Il-ħobż “għoli” jew kif insibuh ukoll, tas-salib jew tas-sikkina, jitpassat bl-għoqda tmiss mat-tilar u fil-fatt għalhekk ħobż ta’ dan it-tip ma jkunx fih ġunġlien. Il-ftajjar jitkebbu l-ewwel u warajhom jitkebbeb il-ħobż għoli u fl-aħħar isir il-ħobż baxx. Il-ħobża titkebbeb f’qisien differenti. Illum aktarx insibu dik li tissejjaħ “kbira” u dik li nsibuha bħala “żgħira”, imma qabel kien isir ħobż ta’ nofs wiżna, ħobż ta’ ratlejn, ta’ ratal u ta’ nofs artal. Ma rridux ninsew li sa ftit deċenji ta’ snin ilu l-ħobż kien bir-razzjon u għalhekk kien jintiżen u jekk il-piż ma kienx ikun eżatt kienet tingħata l-ġonta, biċċa ħobż, jew biċċa ftira, sabiex jintlaħaq il-piż li jkun imiss lil dik il-klijenta li tkun qed tixtri l-ħobż għall-familja tagħha.

Meta jiġi biex jinħema, jew kif jgħidu l-furnara, jinħabeż, jiddaħħlu l-ewwel il-ftajjar, imbagħad il-ħobż baxx u fl-aħħar dak l-għoli. Sakemm tkun maħbuża l-furnata kollha, qabel tingħalaq il-bieba tal-forn, jinħarġu l-ftajjar għax ikunu saru. Hawn nixtieq insemmi tip ta’ ħobż ieħor Malti, li jsir mill-istess għaġna. Qed nirreferi għall-ħobża tal-kexxun. Dan kien ikun ħobż li jitpoġġa fi speċi ta’ kexxun tal-pjanċi u jinħema ġo fih. Dan mhux il-ħobż tas-sandwich imma huwa ħobż Malti li minkejja li jixbah li dak tas-sandwich għandu togħma differenti.

Sakemm ikun qed isir dan kollu, jintefa’ l-ħatab fil-parti tiegħu tal-forn sabiex jilħaq it-temperatura li tista’ ssajjar il-ħobż. Hekk kif jintefa n-nar, tinfetaħ il-bieba tal-forn u jinkines minn xi ġamar li jista’ jkun hemm fil-qiegħa tal-forn. Dan isir b’dik li tissejjaħ kenniesa, lasta twila li jkollha magħha marbuta ċaruta jew xkora li tiddaħħal fl-ilma u biha jintmesaħ qiegħ il-forn.

Dħul u ħruġ

Dak li jitfa’ l-ħobż fil-forn jissejjaħ ħabbież, huwa dak li jaħbeż. Din hija sengħa, għax il-ħabbież irid idaħħal il-ħobż b’mod li malli jibda jsir u jikber ftit, imiss ma’ xulxin. Dik il-parti li tmiss ma’ ħobża oħra tissejjaħ il-bewsa. Il-ħobża tieħu madwar 45 minuta biex issir f’forn tradizzjonali. Issa jibda ħiereġ il-ħobż mill-forn. Joħroġ l-ewwel dak li jkun daħal l-aħħar, jiġifieri l-ħobż tas-salib u tas-sikkina u wara joħroġ il-ħobż baxx. Dan jitpoġġa fit-tilari sabiex kif jibred ikun jista’ titpoġġa fil-van biex tibda d-dawra.

Aktar xogħol

Dan li ktibt sa issa huwa l-proċess bażiku li kien isir sa ftit snin ilu. Illum ma’ dan il-proċess nistgħu nżidu aktar xogħol. Illum issib ħobż tal-Malti imqatta’ u lest fil-boroż. Biex isir dan il-proċess il-ħobż irid ikun bired sewwa, l-ewwel ħaġa għax jekk ikun għadu jaħraq ma jitqattax sewwa u jekk jitpoġġa fil-borża tal-plastik meta jkun għadu sħun dan irabbi l-għaraq u l-ħobża tixxarrab u timmoffa. Barra minn hekk illum insibu ħobż Malti żgħir li jinħema fi pjanċa.

Kemm fiha xogħol ħobża tal-Malti, tarmihiex!

Fr Reno Muscat

Dan l-artiklu deher f'In-Nazzjon - 19 ta' Settembru 2026

Eric Arthur Blair

 

Nemmen li għal ħafna minna l-isem ta’ Eric Arthur Blair ma jfisser xejn, imma jekk ngħidilkom l-isem li kien jinqeda bih fil-kitbiet tiegħu, żgur li ħafna minna, biex ma ngħidx kulħadd, jafu min hu, jew tal-anqas semagħu bih u bil-kitba tiegħu. Eric Arthur Blair ma huwa ħadd għajr il-magħruf George Orwell, l-awtur tar-rumanz satiriku u politiku “Animal Farm” u tal-ktieb “Ninteen Eighty-Four”. Naħseb issa ndunajtu min hu Eric Arthur Blair.

Ħajtu

Eric Arthur Blair twieled fit-25 ta' Ġunju, 1903, f'Motihari, li dak iż-żmien kienet parti mill-Indja Britannika. Missieru, Richard Walmesley Blair, kien jaħdem fis-Servizz Ċivili Indjan, filwaqt li ommu kienet Ida Mabel Blair. Meta kellu madwar sena, ommu ħadet lilu u lil ħutu lejn l-Ingilterra, fejn qatta' l-biċċa l-kbira tat-tfulija tiegħu. Għalkemm il-familja tiegħu kienet tappartjeni għal dak li huwa aktar tard sejjaħ il-"klassi medja bejn dik għolja u dik  baxxa," fil-verità il-familja tiegħu kellha riżorsi finanzjarji limitati ħafna.

Attenda skejjel prestiġjużi, l-ewwel St Cyprian's School u aktar tard Eton College. Minkejja li huwa kien intelliġenti iżda qatt ma kien partikolarment interessat fil-kisbiet akkademiċi. Meta kiber imbagħad kellu tendenza qawwija ta' indipendenza u kellu xettiċiżmu kbir lejn l-awtorità li aktar tard kellu jikkaratterizza x-xogħol letterarju tiegħu. Biex jifhem il-faqar b'mod dirett, huwa għex fil-qrib fost il-fqar f'partijiet ta' Londra u Pariġi. Ħadem xogħlijiet b'paga baxxa, baqa' f'djar ta' akkomodazzjoni, u kien jagħmiha ma' vagaboni u ħaddiema tal-id. Dawn l-esperjenzi saru l-bażi għall-ewwel ktieb kbir tiegħu li huwa semma “Down and Out in Paris and London”.

Bdil tal-isem

Eric Blair adottat l-psewdonomu ta’ George Orwell fl-1933 biex jippubblika l-ewwel ktieb tiegħu, Down and Out in Paris and London. Huwa Għamel dan għal diversi raġunijiet fosthom bħala protezzjoni tal-familja tiegħu. Dan il-ktieb iddeskriva ż-żmien tiegħu li għadda fil-faqar, meta kien jaħdem f'impjiegi baxxi fil-kċina, u jitħallat ma' vagabondi u ħaddiema ta’ klassi soċjai baxxa. Kien jibża' li l-kontenut fil-ktieb tiegħu, li ma kien xejn ta’ klassi għolja, seta’ jimbarazza lill-ġenituri konservattivi tiegħu. Huwa ried joħloq bniedem ġdid minnu nnifsu, ried jinqata’ mill-klassi medja għolja tal-isem tiegħu. Huwa ma kienx iħobbu l-isem "Eric". Għalhekk huwa għażel "George" għax huwa isem tipiku Ingliż, u "Orwell" wara x-xmara pittoreska li nsibu f'Suffolk, l-Ingilterra.

Xogħol u Politika

Matul it-Tieni Gwerra Dinjija, Orwell ħadem bħala ġurnalist u xandar. Huwa ħadem għall-BBC u beda jipproduċi programmi kulturali u politiċi mmirati lejn l-udjenzi fl-Indja. Għalkemm appoġġja l-ġlieda kontra l-faxxiżmu, kien frustrat bil-burokrazija u l-propaganda li kienet għaddejja matul il-gwerra. Dawn il-frustrazzjonijiet qawwew l-impenn tiegħu għal użu ta’ linwaġġ onest u xerred twemminu dwar il-ġurnaliżmu tabilħaqq indipendenti. Matul dan il-perjodu kiteb kitbiet influwenti ħafna dwar il-politika, il-letteratura u l-lingwaġġ użat.

L-isem ta' Orwell sar magħruf bil-pubblikazzjoni tal-ktieb “Annimal Farm”, ktieb li llum insibuh maqlub f’aktar minn 70 lingwa, fosthom bil-Malti bl-isem “Ir-Razzett tal-Bhejjem” miġjub fi lsienna minn George Borg fl-1972. L-istorja tar-rumanz, li hija satira qawwija kontra l-abbuż tal-poter, tidher li hija sempliċi dwar annimali ta’ razzett li jduru u jkeċċu ’l barra mir-razzett lill-propjetarju tar-razzett. Fil-fatt hija allegorija politika dwar ir-Rivoluzzjoni Russa u dwar Stalin. Il-ktieb kien diffiċli biex jiġi ppubblikat inizjalment għax l-Unjoni Sovjetika kienet alleata tar-Renju Unit matul it-Tieni Gwerra Dinjija. Madankollu, ladarba sab ruħu fuq l-ixkafef tal-ħwienet tal-kotba, beda jinxtara u kiseb suċċess kbir.

Il-frażi famuża minn dan ir-rumanz: "L-annimali kollha huma ndaqs, imma xi annimali huma aktar indaqs minn oħrajn." saret waħda mill-aktar dikjarazzjonijiet imsemmija fil-letteratura politika. Orwell juri li l-bhejjem li wettqu r-rivoluzzjoni u keċċew lil sidhom il barra, spiċċaw agħar milli kienu qabel. B’mod sottili Orwell juri kif spiss jinħoloq dittatorjat, anke wieħed naturali,  meta lill-poplu jibdew jittieħdulu l-libertajiet u d-drittijiet li jkun tant ħadem biex kisibhom.

Elf disa' snin u erbgħa u tmenin

Nineteen Eighty-Four huwa rumanz distopiku dwar soċjetà futura immaġinarja f’dinja fittizja, miktub minn George Orwell u ppubblikat fl-1949. Dan il-ktieb huwa meqjus bħala wieħed mill-kapolavuri tal-letteratura tas-seklu 20, huwa rappreżentazzjoni kerha ta’ futur iddominat minn reġim totalitarju li jikkontrolla kull aspett tal-ħajja taċ-ċittadini. Ix-xbihat u l-kunċetti bħal Big Brother, il-pulizija tal-ħsieb u Newspeak (lingwaġġ propogandistiku, vokabularju deliberatament manipulat u ddisinjat minn reġim totalitarju biex jillimita r-reġjun tal-ħsieb uman, jipprevjeni r-raġunar kritiku, u jelimina l-possibbiltà ta' xi ribelljoni) Dawn l-atti saru stabbiliti sew fil-kultura politika moderna.

Illum li għadda kważi seklu mill-kitba ta’ Orwell u aktar minn tliet kwarti ta’ seklu mil-mewt tiegħu, nistgħu naraw kemm kien profetiku dak li kiteb. 

 

Fr Reno Muscat

Dan l-artiklu deher f'In-Nazzjon - 12 ta' Settembru 2026

Nazzjonali

Minkejja l-ħafna differenzi li jeżistu bejnietna l-Maltin, żgur hemm ħaġa li tgħaqqadna minkejja li forsi ftit nindunaw biha. Għal xiex qiegħed nirreferi? Qed nirreferi għal dak is-sentiment li nħossu meta niġu quddiem xi ħaġa, jew xi ħadd li huwa Malti. Infittxu l-bandiera tagħna meta nkunu f’xi post fejn ikun hemm il-bnadar tal-pajjiżi tad-dinja kollha, jew kważi. Nifirħu meta nkunu msiefra u niltaqgħu ma’ xi Malti li jgħix f’dak il-pajjiż. Le, minkejja kollox aħna orgoljużi b’dak li huwa tagħna, dak li huwa nazzjonali. Forsi l-aktar ħwejjeġ li nqisuhom “tagħna” huma l-ilsien Malti, il-bandiera u l-arma. Imma hemm xi ħwejjeġ oħra li huma nazzjonali li forsi ftit naħsbu dwarhom. Ejjew naraw xi ftit minnhom.

Il-kelb

Minkejja li teżisti razza ta’ kelb magħrufa bħala l-Kelb Malti, il-Maltese terrier, dan ma huwiex il-kelb nazzjonali ta’ pajjiżna. Il-kelb nazzjonali ta’ Malta huwa l-Kelb tal-Fenek, li bl-Ingliż jissejjaħ Pharaoh Hound. Minkejja li ismu bl-Ingliż jindika mill-ewwel li għandu x’jaqsam mal-Fargħun tal-Eġittu tal-qedem, studji xjentifiċi fuq din ir-razza ta’ klieb jgħidu li ma għandu l-ebda rabta mal-Eġittu. Għandu mnejn ingħata dan l-isem għax jixbah ħafna lil klieb li nstabu mpittra f’xi oqbra tal-Eġittu tal-qedem. F’pajjiżna nsejħulu tal-fenek għax kien jintuża għall-kaċċa tal-fniek, meta pajjiżna kien għad hawn bosta fniek slavaġġ. L-istoriku Malti Ġan Franġisk Abela, fil-kitba tiegħu tas-sena 1647 isemmi kelb tal-kaċċa Malti, li għandu mnejn kien qed jirreferi għal dan il-kelb. Fl-1974 sar il-kelb nazzjonali ta’ Malta.

Il-pjanta

Widnet il-Baħar, magħruf ukoll bħala Cheirolophus crassifolius u bl-Ingliż Maltese Rock-Centaury, hija l-pjanta nazzjonali ta' Malta. Hija pjanta li tiffjorixxi biss fil-Gżejjer Maltin. Dan ifisser li din il-pjanata ma tinstab imkien ieħor fid-dinja jekk ma tkunx imkabbra, ma titlax fis-salvaġġ bħalma tikber f’pajjiżna. Hija pjanta li tikber fix-xagħri sa għoli ta' 50cm u tagħmel fjuri vjola bejn ix-xhur ta’ Mejju u Lulju. Din il-pjanta llum hija f’periklu kritiku minħabba t-telf ta' raba’ xagħri. Hija speċi strettament protetta taħt il-leġiżlazzjoni nazzjonali u internazzjonali. Din il-pjanta tissemma minn Stefano Zerafa, fil-kitba tiegħu ta’ madwar l-1830. Saret il-pjanta nazzjonali ta’ Malta fl-1973.

L-għasfur

L-għasfur nazzjonali ta’ pajjiżna huwa l-merill li xjentifikament jissejjaħ Monticola solitarius. Dan l-għasfur ibejjed fl-Ewropa ta' Isfel, fl-Afrika ta’ Fuq u ġieli nstab fl-Asja Ċentrali u ċ-Ċina. Huwa jintgħaraf mir-rix ikħal li għandu r-raġel u fuq kollox mill-għanja tiegħu. Huwa jgħix u jbejjet fl-irdumijiet. Fl-2024, merill ġie osservat f’Oregon. Din kienet l-ewwel dehra kkonfermata fl-Istati Uniti, avveniment rari ħafna li ġab interess kbir fost l-osservaturi tal-għasafar. Illum dan l-għasfur huwa protett, biss sa ftit għexieren ta’ snin  ilu kien spiss jinqabad sabiex jinżamm fil-gaġġa minħabba l-għanja sabiħa tiegħu. Fl-1971 dan l-għasfur kien iddikjarat bħala dak nazzjonali ta’ Malta.

Is-siġra

Malta għandha wkoll is-siġra nazzjonali tagħha, imsejħa Tal-Għargħar. Hija siġra mir-razza taċ-ċipress u għalhekk tħaddar is-sena kollha. Is-siġra hija nattiva għar-reġjun tal-Mediterran tal-punent, insibuha ħafna fil-Muntanji Atlas fil-Marokk, l-Alġerija u t-Tuneżija, u numru iżgħar f'Malta u fin-nofsinhar ta' Spanja. Hija siġra li tiflaħ klimi sħan u niexfa bħalma hija dik ta’ pajjiżna. Hija siġra li tikber bil-mod u tista’ tikber bejn 5 u 15-il metru. Aktarx li fil-qedem Malta kienet mimlija b’dawn is-siġar, imma sfortunatament illum skarsaw ħafna, għalhekk fl-1992 is-Siġra tal-Għargħar kienet iddikjarata bħala s-siġra nazzjonali ta’ Malta u sena wara saret protetta mil-liġi u suppost għall-ebda raġuni siġra tal-Għargħar ma tista’ tinqata’.

Żewġ slaleb

Aħna l-Maltin inqisu li għandna żewġ salaleb tagħna, minkejja li l-ebda wieħed minnhom ma huwa ddikjarat bħala s-salib nazzjonali. Is-Salib imsejjaħ ta’ Malta jew is-salib ta’ tmien ponot kien magħruf bħala s-Salib ta’ Amalfi sa mis-seklu XI, imma kien, u għadu, wkoll is-simbolu tal-Ordni ta’ San Ġwann li adottawh fis-sena 1126. Meta l-Kavallieri waslu Malta ġabuh magħhom u wara li telqu baqa’ magħruf bħala s-Salib ta’ Malta,  kif baqgħu magħrufin ukoll l-istess kavallieri.

Salib ieħor li nqisuh tagħna huwa l-George Cross li nsibu kemm fuq il-bandiera nazzjonali kif ukoll fuq l-arma tar-Repubblika ta’ Malta. Il-George Cross ingħatat lil Malta mir-Re Ġorġ VI fil-15 ta' April, 1942, biex jonora liċ-ċittadini tagħha għall-kuraġġ tagħhom matul it-Tieni Gwerra Dinjija. Dan is-salib dlonk sab postu fuq il-bandiera Maltija, minkejja li llum hawn xi wħud li jarawh żejjed, biss huwa parti mill-istorja ta’ pajjiżna u dnub jekk inwarrbu dan is-simbolu li jonora lil missirijietna. Minkejja li dan is-salib bl-unur li jġorr miegħu kien mogħti li numru ta’ individwi jew għaqdiet, Malta tista’ tiftaħar li hija l-pajjiż waħdieni li rċevietu.

Dawn huma xi wħud mill-ħwejjeġ li jagħmluna Maltin u għalhekk bix-xieraq jissejħu Nazzjonali. Tajjeb nibżgħu għalihom.

Fr Reno Muscat

Dan l-artiklu deher f'In-Nazzjon - 5 ta' Settembru 2026

Punt ħjata

 

Fi ċkuniti, allura madwar nofs seklu ilu, il-ħajja tagħna kienet għal kollox differenti minn dik tal-lum. Tradizzjonijiet u drawwiet, snajja u ħidmiet li llum jew twarrbu u spiċċaw jew qegħdin fl-għafja tal-mewt, agunija. Fost dawn is-snajja nistgħu nsemmu s-sengħa tal-ħjata. Illum kulħadd jixtri l-ħwejjeġ meħjutin lesti, mhux bħal fi ċkuniti, li tibdila ġdida kienet tfisser żjara għand il-ħajjata biex toħodlok il-qies, imbagħad wara li t-tibdila titfassal u tingħaqad bit-tixlil, tmur iġġarrab. Illum mhux biss is-sengħa tal-ħjata qed tgħib minn fostna imma anke t-terminoloġija, il-kliem użat mill-ħajjata, ħafna lanqas jafu xi jfisser.  Nistħajjilkom tgħidu allura jien kif naf b’dawn il-kliem u naf ukoll xi jfissru? Le, jien qatt ma kelli s-sengħa ta’ ħajjat, imma fil-familja kelli min iħit u għalhekk fi ċkuniti kont spiss nisma’ dan il-kliem tekniku u isma’ llum u isma’ għada fl-aħħar titgħallem int ukoll. Kelli z-zija Tonina, xebba tieħu ħsien in-nannu u n-nanna, li kienet tħit għaliha, għalina u għan-nies. Ommi wkoll kienet tagħmel xi punt ħjata, bħala kważi n-nisa tad-dar kollha ta’ dak iż-żmien. Niftakar il-magna tal-ħjata bla mutur u taħdem bil-pedala tas-saqajn. Il-magna tal-bużnanna hekk kienet, u Alla jbierek għadha taħdem sal-lum. Għax tajjeb ngħidilkom li anke l-bużnanna kienet taf tħit u jingħad li kienet tħit l-għonnelel. Illum hawn min lanqas iwaħħal buttuna ma jaf kif. X’differenza!

Ma nafx kif ġietni l-kurżità dwar l-ilbies u l-ħjata u dak li skoprejt nixtieq naqsmu magħkom għaliex veru interessnti.

Ftit storja

Ħadd ma jaf meta l-bnedmin bdew iħitu u jagħmlu l-ħwejjeġ, iżda l-eqdem labra tal-ħjata fid-dinja tmur lura madwar 50,000 sena. Filwaqt li llum tidher qisha għodda sempliċi, il-labra tal-ħjata dak iż-żmien  kienet invenzjoni kbira, tal-għaġeb, kważi kważi miraklu.

Ħafna xjentisti jemmnu li l-bnedmin bdew jilbsu l-ħwejjeġ bejn 100,000 u 500,000 sena ilu. L-ewwel bnedmin probabbilment bdew jilbsu l-ħwejjeġ billi jgħaqqdu u jorbtu l-ġlud tal-annimali u wara bdew iħitu dawn il-ġlud flimkien permezz ta’ labar tal-għadam. Kellhom jgħaddu bosta eluf ta’ snin qabel ma l-avvanzi fit-tessuti għamlu possibbli l-invenzjoni tal-magna tal-ħjata.

Meta mqabbla mal-istorja twila tal-labar tal-ħjata, l-istorja tal-magni tal-ħjata hija relattivament waħda qasira, iżda mhijiex inqas minn miraklu. Mill-invenzjoni tal-magna tal-ħjata matul ir-Rivoluzzjoni Industrijali, madwar 250 sena ilu, saru avvanzi inkredibbli. Il-bniedem komuni għadda minn ħwejjeġ mhux raffinati għal ħwejjeġ ta’ kwalità għolja li jkunu maħdumin bil-kwantità fi żmien relattivament qasir.

Il-magna tal-ħjata

Il-magni tal-ħjata ġew ivvintati matul l-ewwel Rivoluzzjoni Industrijali. L-ewwel Rivoluzzjoni Industrijali seħħet bejn l-1760 u l-1840. Bdiet fil-Gran Brittanja u kienet waħda miil-ewwel bidliet kbar u effettivi fis-soċjetà umana li bidlet l-industriji mill-produzzjoni bl-idejn għall-produzzjoni bil-magni.

Din ir-Rivoluzzjoni Industrijali ħolqot ukoll ħtieġa għal bidla fl-industrija tat-tessuti, li bbenefikat bil-kbir mill-magni l-ġodda li ġew ivvintati. In-newl tal-qedem twarrab biex bdew jiġu minsuġa drappijiet b’magni elettriċi ġodda, u l-magni tal-insiġ tal-qoton żiedu l-produzzjoni tal-ħaddiem tal-fabbriki tat-tessuti b’madwar 500 darba.

F'daqqa waħda, id-drappijiet u t-tessuti saru abbundanti. Hekk kif il-produzzjoni tad-drappijiet kompliet taqbeż il-manifattura tal-ħwejjeġ, il-ħażniet tad-drappijiet kibru. B’lingwaġġ tekniku llum ngħidu li l-produzjoni kienet akbar mit-talba. Peress li l-ħjata bl-idejn kienet teħtieġ ħafna xogħol u ħin, il-magni kienu r-risposta għall-problemi tal-produzzjoni, il-kunċett tal-magna tal-ħjata kien inevitabbli.

Min ivvintaha?

Fl-1755, Charles Weisenthal kien l-ewwel persuna li kiseb rikonoxximent relatat ma’ magna tal-ħjata. Weisenthal, inventur u tabib Ġermaniż, irċieva dan ir-rikonoxximent għal-labra ta’ magna tal-ħjata, li allura kien ifisser li kien hemm magna għaliha. Il-fatt li kiseb rikonoxximent għal-labra juri li n-nies xorta taw importanza konsiderevoli lil-labra, li l-bnedmin kienu ilhom jużaw għal żmien twil.

Filwaqt li Weisenthal spiss jingħata l-kreditu għall-idea ta’ magna tal-ħjata, Thomas Saint mill-Ingilterra ddisinja l-ewwel magna tal-ħjata. Thomas Saint huwa aktarx meqjus bħala l-inventur tal-magna tal-ħjata, u huwa ġab id-disinn tal-magna tal-ħjata eqreb lejn ir-realtà.

Fl-1790, Saint ħoloq tpinġijiet dettaljati ta’ magna tal-ħjata, għalkemm m'hemm l-ebda evidenza li turi li huwa bena xi tip ta’ magna tal-ħjata. Ma kienx qabel l-1874, kważi seklu wara, li William Newton Wilson sab it-tpinġijiet ta’ Saint u uża dawk id-disinji biex jibni l-ewwel magna tal-ħjata li taħdem bi mratt manwali.

Fl-84 sena bejn iż-żmien li Thomas Saint ħoloq id-disinn tal-magna tal-ħjata u meta William Newton Wilson bena magna, kien hemm diversi tentattivi biex tinħoloq magna tal-ħjata. Xi wħud minn dawn l-isforzi ma rnexxewx, iżda dawn kienu l-oriġini tal-magni tal-ħjata li wasslu għat-twelid tal-ewwel magna tal-ħjata fl-1846. Ma nidħolx fil-mertu ta’ min ivvintaha għax l-idea riedet tkun imma riedet titħażżeż fuq karta u minn tħażżiż fuq karta ried ikun hemm min jirrealizza dik l-idea mpinġija.

Fr Reno Muscat

Dan l-artiku deher f'In-Nazzjon - 29 ta' Awwissu 2026

Id-dulliegħ

Bla dubju ta’ xejn fost il-frott kollu tas-sajf, id-dulliegħ huwa wieħed mill-aktar popolari għax bla dubju minbarra t-togħma tajba tiegħu, fih ħafna meraq u felli dulliegħa kiesaħ jaqta’ l-għatx żgur fil-jiem sħan tas-sajf. Id-dulliegħa hija pjanta annwali b’weraq kbar u frott kbir, tond jew ovali. Il-pjanta hija rikonoxxibbli mill-weraq distintivi tagħha u l-għadd kbir ta' frott li tipproduċi, saħansitra kultant sa mitt waħda kull pjanta. Il-frott huwa disponibbli esklussivament fil-perjodu tas-sajf, bejn wieħed u ieħor minn Mejju sa Settembru.

Oriġini

Aktarx li l-ewwel kultivazzjoni tad-dulliegħ saret fl-Eġittu tal-qedem. Hemm leġġenda li tgħid li kien f'dan il-post stess li d-dulliegħa oriġinat miż-żerriegħa ta’ Set, l-alla Eġizzjan tal-qedem tad-deżert, maltempati, kaos, vjolenza u l-barranin. Spiss kien ikun impitter b’ġisem ta’ bniedem iżda b'ras misterjuża ta' annimal. Dan l-alla kien magħruf għall-qtil ta' ħuh Osiris. Għalhekk, l-Eġizzjani kienu jpoġġu għadd ta’ dulliegħ fl-oqbra tal-Fargħuni, bħala mezz ta' sostenn għall-ħajja ta' wara. 

It-tabib Skoċċiż, missjunarju u l-esploratur famuż tal-Afrika David Livingstone, li għex bejn l-1813 u l-1873, kien qal li l-pjanta tad-dulliegħ tikber b'mod abbundanti fid-Deżert ta’ Kalahari, minn fejn jidher li oriġinat. Hemmhekk, il-frott jikber selvaġġ u huwa magħruf bħala tsamma. Id-Deżert ta’ Kalahari jestendi fuq żona ta’ aktar minn disa’ mitt elf kilometru kwadru u huwa mifrux fi tliet nazzjonijiet, Il-Botswana, in-Namibja u l-Afrika ta’ Isfel. Dan id-deżert huwa xott ħafna u għal din ir-raġuni l-frotta tad-dulliegħ hija sors regolari ta' ilma għall-abitanti taż-żona, kif ukoll isservi bħala ikel kemm għall-bnedmin kif ukoll għall-annimali.

Fis-seklu 10 AD , id-dulliegħ beda jkun ikkultivat fiċ-Ċina, biex illum dan il-pajjiż sar l-akbar produttur fid-dinja ta’ din il-frotta bnina. Huwa kkalkulat li f’dan il-pajjiż ikunu prodotti 63,960,353 tunellata ta’ dulliegħ kull sena. Fl-Ewropa, il-pjanta ta’ din il-frotta ġiet introdotta mill-Għarab fis-seklu tnax.

Forma, lewn u varjetà

Bħalma għidt, u ovvjament tafu, id-dulliegħ ikun tond jew ovali, biss xi snin ilu fil-Ġappun bdew jibdlu l-forma ta’ din il-frotta. Dan isir billi meta titfaċċa l-frotta fix-xitla, din jitpoġġielha kontenitur kwadru madwarha biex meta tikber tieħu l-forma tiegħu. Dulliegħa kwadra tkun aktar faċli biex tinġarr u jinħela anqas spazju fil-ġarr.

Fejn jidħol il-lewn tad-dulliegħ aħna ngħidu li hija ħadra minn barra u ħamra minn ġewwa, iżda ġieli naraw dulliegħ li jkun isfar minflok aħmar. Il-dulliegħ isfar huma naturali. Fil-fatt din hija varjetà antika li kienet teżisti qabel id-dulliegħ aħmar komuni, u tmur lura għal aktar minn 5,000 sena. Il-kulur safrani mhuwiex riżultat ta' modifika ġenetika imma sempliċement iseħħ għax ma jkunx fiha il-lycopene, l-antiossidant li jagħti lid-dulliegħa l-ħamra l-kulur distintiv tagħha. Spiss id-dulliegħ isfar ikun aktar ħelu minn dak aħmar.

Il-varjetajiet tad-dulliegħ jaqgħu primarjament f'erba' kategoriji ewlenin: dawk biż-żerriegħa, dulliegħ mingħajr żerriegħa, dulliegħ minjatura, u frotta bil-qalba safra jew tagħti fl-oranġjo. Il-bdiewa Maltin normalment ikabbru l-varjetà tradizzjonali jiġifieri dulliegħ biż-żerriegħa b'żrieragħ peress li din il-varjetà  għandha togħma aqwa minn varjetajiet oħra.

 Festival

Id-dulliegħa daħlet ukoll fl-arti u hawn artisti li joħolqu skultura minnha. Fl-2006, beda jsir il-Festival imsejjaħ Melounovy fil-belt ta’ Praga fir-Repubblika Ċeka. Dan il-festival iġib flimkien xi wħud mill-aqwa artisti tad-dulliegħ minn madwar id-dinja ta’ kull sena. Din l-arti qegħda kulma jmur issir aktar popolari u anke f’pajjiżna ġieli naraw xi skultura fid-dulliegħa. L-isfortuna hija li din hemm żmien limitat kemm tkun tista’ titgawda għax il-frotta tispiċċa.

Benefiċji

Id-dulliegħa hija frotta idratanti ħafna u b'kaloriji baxxi, mimlija antiossidanti, il-vitamini A u Ċ, u l-aċidu amminiku li jgħin ħafna lis-saħħa tal-qalb billi fost oħrajn ibaxxi l-pressjoni, inaqqas l-infjammazzjoni, u jgħin fl-irkupru mill-eżerċizzju u l-vitalità tal-ġilda. Id-dulliegħa fiha 92% tagħha ilma u għalhekk kull felli (medju mhux kbir ħafna) fih madwar 45 kalorija. Għalhekk dan il-frott huwa tajjeb ħafna għal min irid jagħmel dieta biex inaqqas mill-piż. Mill-banda l-oħra, id-dulliegħa fiha ammont sostanzjai ta’ zokkor naturali allura wieħed irid joqgħod attent l-aktar jekk ikun diabetiku. Imma ammonti moderati ma jagħmlu ħsara lil ħadd.

Ħaġa moħġaġa

Id-dulliegħa daħlet ukoll fil-folk Malti u missirijeitna kienu jgħidu ħaġa moħġaġa hekk: "Ħamra nar, nar mhijiex, ħadra ħaxix, ħaxix mhijiex, tnixxi l-ilma, għajn mhijiex". Kien hemm min iżid ukoll: “Tonda bħad-dinja, dinja mhijiex”. Ikollna nammettu li din il-ħaġa moħġaġa llum tilfet ftit mis-sens tagħha għax mal-ħmura nsibu l-isfar u l-forma tad-dinja tibqa’ tonda imma d-dulliegħa minbarra ovali nistgħu nsibuha kwadra wkoll.

Hi x’inhi, din il-frotta hija waħda mill-itjeb li nistgħu nduqu matul is-sajf, sew fuq il-mejda tal-ikel id-dar kif ukoll fejn il-baħar. U xi ngħidu għal felli dulliegħa friska wara xi barbeque?

Fr Reno Muscat

Dan l-artiklu deher f'In-Nazzjon - 22 ta' Awwissu 2026

Awwissu u Santa Marija

Niftakar lill-bużnanna tiegħi, li l-Qriema kienu jafuha bħala Anni Galluwa, kienet issejjaħ ix-xhur bl-isem ta’ xi qaddis li jkun iċċelebrat f’dak ix-xahar partikolari. Pereżempju jekk kont tgħidilha li ġejja oħtha taraha minn Tuneż f’April kienet issaqsik April jekk hux ix-xahar ta’ San Ġorġ. U hekk il-bqija tax-xhur l-oħra tas-sena. Meta kienet tirreferi għal Awwissu kienet issejjaħlu “Ta’ Santa Marija”, u bir-raġun għax propju f’nofsu niċċelebraw is-solennità t-tlugħ ta’ Marija Santissa fis-sema bir-ruħ u l-ġisem. Minkejja s-sekularizazzjoni kollha li teżisti madwar id-dinja kollha, din il-festa timmarka żmien partikolari, bħalma huma l-vaganzi u l-mistrieħ mix-xogħol, dak li jissejjaħ shut down u bit-Taljan Ferragosto. Ejjew naraw xi ħaġa żgħira dwar din il-festa.

Domma ta’ fidi

L-Assunzjoni ta' Marija hija domma tal-Knisja Kattolika maħruġa fl-1950 mill-Papa Pju XII, li tgħid li l-Verġni Marija, fl-aħħar ta' ħajjitha fid-dinja, ġiet imtellgħa fis-sema kemm bil-ġisem kif ukoll bir-ruħ. Din il-festa tkun iċċelebrat kull sena fit-15 ta' Awwissu. Din id-domma hija bbażata fuq it-twemmin li Marija, li ġiet ippreservata mid-dnub oriġinali (Immakulata Kunċezzjoni), ma kinitx suġġetta għall-korruzzjoni li sseħħ permezz tal-mewt. Id-dokument uffiċjali li ta’ din id-domma jġib l-isem ta’ Munificentissimus Deus, jiġifieri “Alla l-Iktar Ġeneruż” u kien mogħti lill-Knisja nhar l-1 ta’ Novembru tal-1950.

Is-7 Santa Marijiet u aktar

Spiss insemmu s-seba’ Santa Marijiet għax seba’ parroċċi li jiċċelebraw il-festa tal-Assunta nhar il-15 ta’ Awwissu. Insibu sitta minnhom f’Malta u waħda f’Għawdex. Dawn huma: Ħal Għaxaq, il-Gudja, Ħ'Attard, il-Mosta, l-Mqabba, il-Qrendi u r-Rabat Għawdex, li ta’ min jgħid li din mhix biss parroċċa imma wkoll il-katidral tad-Djoċesi ta’ Għawdex. Intant ma’ dawn irridu nżidu erba’ parroċċi oħra li l-Assunta hija t-titular tagħhom: Ħad-Dingli, l-Imġarr, Birkirkara l-knisja l-qadima u ż-Żebbuġ Għawdex.

Minbarra dawn insibu wkoll numru sabiħ ta’ kappelli li wkoll huma ddedikati lil Santa Marija. B’kollox insibu 29 kappella madwar Malta u Għawdex li l-Assunta hija titulari tagħhom. Hemm xi rħula li għandhom żewġ kappelli ddedikati lilha bħall-Għargħur, Ħaż-Żebbuġ, is-Siġġiewi, ir-Rabat Malta, Ħaż-Żabbar, in-Naxxar u ż-Żejtun imbagħad Ħal Qormi nsibu tlieta: tal-Ħlas, tal-Qrejqċa u tal-Blat. Skont l-istoriku Ġan Franġisk Abela, il-katidral tal-Imdina oriġinarjament kien iddedikat lill-Assunta wkoll. Ma nafx ngħidilkom sew għax dan l-istoriku Malti kiteb hekk fl-1647. Ma nistax ma nsemmix forsi l-aktar santwarju għażiż għalina l-Maltin, il-Knisja ta’ Pinu f’Għawdex, li wkoll hija ddedikata lil Marija mtellgħa s-sema.

Mela mhux 7 biss għandna. Jissemmew 7 għax fl-imgħoddi kien ikun hawn min iżur dawn is-seba’ parroċċi fl-14 ta’ Awwissu, lejlet l-Assunta. Illum faċli żżurhom bil-karozza imma meta bdiet din id-drawwa t-trasport kien differenti, biż-żiemel, bil-bagħal jew b’xi ħmar, jew inkella b’ta’ San Franġisk kif kienu jgħidu dak iż-żmien jekk kont titlaq bil-mixi.

Il-konvoj

Waħda mill-operazzjonijiet navali l-aktar kruċjali li seħħew matul it-Tieni Gwerra Dinjija b’relazzjoni ma’ pajjiżna hija dik bl-isem ta’ Operation Pedestal imma mal-Maltin magħrufha bħala l-Konvoj ta’ Santa Marija. Din seħħet bejn il-11 u l-15 ta' Awwissu 1942, megħjun minn flotta Ingliża, dan il-konvoj wassal provvisti essenzjali ta’ ikel li salvaw lill-poplu Malti mill-ġuħ u li b’konsegwenza gżiritna setgħet taqa’ f’idejn l-għadu.  Kienet sitwazzjoni ddisprata. Fl-1942, Malta kienet f'mument kritiku ħafna minħabba nuqqas kbir ta' ikel, petrol u żjut oħra kif ukoll munizzjon għall-gwerra. Il-gżira kien fadlilha biss ftit ġimgħat qabel ma jkollha ċċedi. Minn flotta ta' 14-il vapur tal-merkanzija, 5 bastimenti biss irnexxielhom jaslu fil-port ta’ Malta, wara li ffaċċjaw attakki kontinwi minn sottomarini u ajruplani Ġermaniżi u Taljani. It-tanker Amerikan SS Ohio kien l-aktar vapur importanti għax kien qed iġorr il-pitrolju u l-petrol għall-ajruplani. Wara li ntlaqat u ġarrab ħsarat kbar, l-Ohio ddaħħal fil-Port il-Kbir fil-15 ta' Awwissu, miżmum f'wiċċ l-ilma bejn żewġ distrojers Ingliżi, l-HMS Penn u l-HMS Ledbury. Il-provvisti taw nifs ġdid lill-poplu u żammew lil Malta fil-gwerra bħala bażi strateġika f'nofs il-Mediterran. Il-wasla tiegħu f'jum il-festa ta' Santa Marija saħħet il-fidi u l-moral tal-Maltin f'perjodu daqstant ikrah. Sal-lum dan il-konvoj għadu magħruf bħala dak ta’ Santa Marija.

Festa kbira

Rajna xi rabtiet bejn din il-festa u pajjiżna. Mhux ta’ b’xejn li din il-festa hija festa kmandata, jiġifieri n-Nisrani huwa obbligat jisma’ l-quddies. Tabilħaqq li l-ebda qaddis jew qaddisa oħra f’pajjiżna ma jgawdi daqstant devozzjoni, imma mhux ta’ b’xejn u mhux ta’ bxejn lanqas li Santa Marija hija l-patruna speċjali tal-gżejjer tagħna l-Maltin u l-Għawdxin. Mhux ta’ b’xejn li l-bużnanna, u min jaf kemm oħrajn li għexu fi żmienha, kienu jsibu lil Awwissu bħala x-xahar ta’ Santa Marija.

Fr Reno Muscat

Dan l-artiklu deher f'In-Nazzjon -  ta' Awwissu 2026

 

Sentiment ta’ rabja

 

Nemmen li ħafna minnkom, bħali tużaw il-midja soċjali u bħali taraw dak li jkun qed iseħħ. Dawn l-aħħar ġimgħat dehru bosta kummenti dwar nuqqasijiet li qed iseħħu f’pajjiżna u li qed itellfu l-paċi ta’ dak li jkun. Rajna filmati ta’ żgħażagħ jgħajtu u jagħtu fastidju lir-residenti, oħrajn iħabbtu l-bibien tan-nies matul il-lejl, koppja fil-gallarija lebsin bħal Adam u Eva qabel kielu t-tuffieħa u agħar minn hekk ukoll, ġuvintur jaqbżu fuq il-karozzi pparkjata fit-triq, ġlied u storbju, tfajla mperrċa fit-taraġ li jwassal għall-Knisja ta’ Ġieżu l-Belt u biex tgħaxxaq kollox, waqt mewġa qalila ta’ sħana beda jinqata’ d-dawl. Dan kollu, u min jaf kemm aktar, iwassal biex fil-bniedem jitnissel sentiment ta’ rabja. Ma nagħtix tort lil min wara dan kollu jaġixxi b’mod mhux normali. Ma naqbilx ma’ min jieħu l-liġi b’idejh, imma rridu naraw xi jkun wassal li dak it-tali jaġixxi kif ikun aġixxa.

Mal-lista tal-emozzjonijiet insibu l-istat ta’ rabja. It-tfittxija għal definizzjoni xjentifika tat-terminu “rabja” mhix faċli. Hawn min isostni li r-rabja hija stat tal-moħħ ta’ xi ħadd li ma jaċċettax li l-affarijiet iseħħu mingħajr il-kunsens tiegħu li ma jseħħuh kif ikun pjanahom hu jew kif jixtieqhom hu.

Effetti interni u esterni

Persuna li spiss tħoss rabja ġewwa fiha aktarx tesperjenza effetti fiżiċi, bħal żieda fir-rata tal-qalb, pressjoni tad-demm għolja u livelli ogħla ta’ adrenalina. Ir-rabja mbagħad issir is-sensazzjoni predominanti fl-imġieba tal-persuna bir-riżultat li din taġixxi b’mod differenti minn meta l-istess persuna tkun fi stat ta’ kalma. Ir-rabja jista’ jkollha ħafna konsegwenzi fiżiċi u mentali. L-espressjoni esterna tar-rabja tista’ tinstab fl-espressjonijiet tal-wiċċ bħalma huma il-lingwaġġ tal-ġisem bħal ngħidu aħna tixjir eċċessiv tal-idejn jew tas-saqajn. Ir-rabja tista’ twassal biex ir-reazzjonijiet fiżjoloġiċi tal-persuna xi drabi jinbidlu f’atti ta’ aggressjoni. Filwaqt li ħafna minn dawk li jesperjenzaw ir-rabja jgħidu li ħafna drabi din tkun riżultat ta’ dak li jkun ġralhom jew effett ta’ ġrajja li jkunu għaddew minnha, il-psikologi jwissu li persuna rrabjata tista' ħafna drabi tiżbalja minħabba li r-rabja tikkawża telf fil-kapaċità li wieħed jikkontrolla l-atti tiegħu.

Normali new le?

Il-psikologi llum iqisu r-rabja bħala emozzjoni normali, naturali u matura esperjenzata minn prattikament il-bnedmin kollha xi drabi jew oħra. Huma jqisuha wkoll bħala xi ħaġa li għandha valur funzjonali għas-sopravivenza. Iżda r-rabja mhux ikkontrollata tista’ taffettwa b'mod negattiv il-benessere personali kif ukoll dik soċjali u ħafna drabi tħalli impatt negattiv fuq dak li jkun u fuq dawk ta’ madwaru. Filwaqt li ħafna filosfi u kittieba wissew kontra l-attakki spontanji u mhux ikkontrollati ta’ rabja, kien hemm nuqqas ta’ qbil dwar l-effetti tar-rabja. Il-kwistjoni tat-trattament tar-rabja ilu jinkiteb dwaru minn żminijiet tal-filosfi tal-qedem, iżda psikologi moderni, b'kuntrast ma’ kittieba preċedenti, isostnu wkoll li t-tażżin tar-rabja jista’ jkollu effetti negattivi.

Kontroll jew kura

Fir-rabja dejjem ikun hemm żewġ partijiet tal-inqas. Ġieli bniedem ikun irrabjat miegħu nnifsu u dan iseħħ fil-ġlieda ta’ kif dak il-bniedem ikun jinstab kontra il-perspettiva li dak l-istess bniedem jipproġetta viżjoni tiegħu nnifsu, allura f’dawn il-każi wkoll ikun hemm żewġ partijiet; kif jien u kif nixtieq li nkun. Ir-rabja, bħall-emozzjonijiet kollha, m'għandhiex tiġi ġġudikata sabiex tiġi ttrattata, iżda jeħtieġ li tinftiehem u tinbidel fir-relazzjoni ġdida ta’ fejqan. Il-kura għandha bħala l-prattika tagħha, it-tmiem tal-ħtieġa li parti tiddomina lill-oħra. Il-parti l-oħra għandha tibda tiġi meqjusa bħala interlokutur li m’għandu xejn x’jaħbi u m’għandu l-ebda xewqa li jgħakkes, iqarraq, jaħkem, jikkalpesta jew imur kotra x-xewqa ta’ dak li jkun.

L-aċċettazzjoni tal-istat li tkun fih il-parti rrabajta, it-tama li r-raġunijiet jew skużi tagħha se jkunu mismugħa huma kruċjali biex ir-rabja tisparixxi mill-karattru ta’ dak li jkun. Meta naħsbu fir-rabja nistgħu inġibu quddiem għajnejna maskra: oġġett li ma jħalliniex naraw wiċċ dak li jkun hemm moħbi warajh. Hekk hi r-rabja! Ovvjament, jista’ jkun li hemm tbatija moħbija wara r-rabja. B’hekk nistgħu nħossu rabja lejn persuna jew sitwazzjoni mingħajr ma nifhmu r-raġuni. Nies irrabjati jistgħu jsibu ruħhom mwaħħlin fil-mudelli sterjotipiċi ta’ ħsieb u mġiba, iħossuhom maqbuda u jistgħu jaslu biex jemmnu li d-dinja kollha tobgħodhom, li l-ħajja hija inġusta, u li ħadd ma jagħraf is-siwi tagħhom fid-dinja.

Fr Reno Muscat

Dan l-artiklu deher f'In-Nazzjon 7 ta' Awwissu 2026

Il-Midja Soċjali... Minn vjaġġ twil għar-realtà tal-lum

Mela darba, l-iskambji soċjali kienu jsiru permezz ta’ taħdidiet madwar il-mejda tal-ikel fil-kċina jew fuq il-bankina quddiem il-bieb ta’ barra jew inkella għand il-ħanut tal-merċa kif ukoll fuq il-linja tat-telefon. Il-posta kienet tintbagħat permezz ta' ittra f’envelopp li fuqu jinkiteb l-indirizz u titwaħħal bolla u mbagħad din kienet tgħaddi mis-sistema postali, u l-aħbarijiet kienu jiġu ppubblikati fil-gazzetta stampata. Il-wasla tar-radju u t-televiżjoni għamlet biddliet kbar. Xi snin wara wasal l-internet, li għaqqad lin-nies fuq il-World Wide Web, u kollox inbidel mill-ġdid. Din hija l-istorja fil qosor tal-midja soċjali. Bdejt dan l-artiklu bil-kliem li aktarx nibdew xi storja jew xi ħrafa: “Mela darba”, għax tabilħaqq il-vjaġġ li għamlet il-midja soċjali donnha ħrafa.

X'inhu l-midja soċjali?

Il-midja soċjali llum tirreferi għal għadd mhux ħażin ta’ applikazzjonijiet li nsibu fuq il-web li jippromwovu l-ħolqien ġdid kif ukoll il-bdil ta' materjal jew kontenut li jkun iġġenerat minn dak li jkun qed juża l-applikazzjoni. L-ispazju tal-midja soċjali huwa globali, b'firxa ta' suġġetti u tip ta' dawk li jużawha, kważi bla limitu. Il-midja soċjali tinkludi siti tal-internet bħal Facebook u Instagram ta' Meta, X (li qabel kien Twitter), YouTube, Yelp, u ħafna blogs minn madwar id-dinja kollha. Pereżempju jiena, dawn l-artikli tiegħi wara li jkunu ġew ippubblikati fuq dan il-ġurnal, nitfa’ kollox fuq blog li kont bdejt xi 12-il sena ilu. Nammetti li mhux dejjem inkun puntwali u nammetti wkloll li dan l-aħħar traskurajt xi ftit minħabba l-bosta mpennji li għandi.

Fejn nużawha

Il-midja soċjali saret network vast u informali ta' postijiet online li jistgħu jkunu pubbliċi jew privati, li magħhom ikun hemm abbonamenti x’jitħallas jew inkella hemm minnhom b'xejn, kemm kbar kif ukoll żgħar. Illum il-midja soċjali jintuża għal diversi skopijiet, bħal ngħidu aħna għal xi ċelebrazzjoni tal-familja, Illum l-inviti ma għadhomx isiru bħalma kienu jsiru qabel. Illum avviż fuq il-midja soċjali, jew oħloq avveniment, li jissejjaħ “event” u fih tistieden lil dawk li trid int u jkunu jistgħu jirrisponduk lura jekk ikunux ser jattendu jew le. Illum anke għal tiġijiet saru jsiru dawn l-inviti minflok l-invit stampat tal-imgħoddi. Għadna kif għaddejna minn kampanja elettorali li fiha stajna naraw l-użu tal-midja soċjali għax ma nemminx li kien hawn kandidat wieħed biss li ma kellux account ta’ xi waħda mill-applikazzjonijiet tal-midja soċjali. Ma’ dan inżid attivitajiet karitattivi, gruppi ta' appoġġ għas-saħħa, klabbs sportivi, każini tal-banda, gruppi ta’ passatempi partikolari, kumpaniji kummerċjali, agenziji tal-ivjaġġar u iva, anke gruppi ta’ talb. Fi ftit kliem nistgħu ngħidu li l-midja soċjali daħlet f’kull rokna ta’ ħajjitna.

Effett

Forsi bla ma ndunajna, il-midja soċjali daħlet f’ħajjitna u biddlitna. Jekk noqgħodu naħsbu ftit ma ndumux wisq biex nintebħu kemm għandha influwenza kulturali fuq dak li nagħmlu. Araw il-moda u anke l-ikel, kwistjonijiet ta' saħħa tal-familji u l-adolexxenti, aħbarijiet dinjija u avvenimenti lokali, avvenimenti politiċi u ta' azzjoni komunitarja. Il-midja soċjali ħolqot tip ġdid ta' marketing permezz tal-użu ta' personalità pubblika virtwali li tissejjaħ influencer. Ma setax jinħoloq isem aħjar għal dawn il-personalitajiet għax tabilħaqq jinfluwenzaw lil mases ta’ nies.

Il-midja soċjali saret fenomenu kumpless għax hija ħafna iktar minn sempliċement individwi li jitkellmu bejniethom bħalma kien snin ilu, żmien ic-chatting fuq dak li konna nsejħulu Bulletin Board System (BBS) jew aktar tard ic-chat rooms. Is-siti tal-midja soċjali – il-postijiet fejn iseħħu l-komunikazzjonijiet – huma kkontrollati mis-sidien tal-pjattaforma tagħhom u inti tixrob minn dak li joffru huma.

Anti soċjali?

Il-mezzi tal-midja soċjali jistgħu jkunu wkoll anti soċjali. X’jiġifieri? Meta ngħidu “Soċjali” nkunu rridu nfissru li xi ħaġa hija tas-soċjetà u ssir mas-soċjetà umana, l-interazzjoni bejn individwi, u l-ħajja f'gruppi. Din il-kelma ġejja mill-kelma Latina socius, li tfisser "sieħeb" jew "alleat." Li tkun soċjali huwa dwar konnessjoni, empatija, u parteċipazzjoni f'komunità aktar milli taġixxi b'mod iżolant u waħdek. Imma fir-realtà, dawn il-mezzi kemm qed ikunu soċjali? Kemm drabi dawn il-mezzi qed jiżolaw lil min jużahom? Illum anke l-ulied mal-ġenituri, waqt li jkunu kollha d-dar, jikkomunikaw bejniethom permezz tal-midja soċjali: Iben jikteb lil ommu: “Ma, ibgħatli xħin isir l-ikel ħalli ninżel u niekol għax bil-ġuħ!” Issa dan il-messaġġ seta’ sar billi l-iben iqum u jmur fil-bieb tal-kamra tiegħu u minn hemm jgħid lil ommu dak li għandu jgħidilha.Imma t-tendenza hija dik li juża l-midja soċjali.

Mhux ta’ b’xejn li bosta pajjiżi llum qed jikkonsidraw età minima meta wieħed ikun jista’ jibda juża dawn il-mezzi għaliex l-effett negattiv tagħhom rikibna u għandna mnejn lanqas qed intebħu bih.

 

Fr Reno Muscat

 

Il-jum tas-Sibt

 

Issa ilni numru mhux żgħir ta’ snin nikteb artikli f’dan il-ġurnal. Dawn l-aħħar snin l-artikli tiegħi dehru dejjem fil-jum tas-Sibt. Ġie f’moħħi dan il-fatt u ħsibt li nikteb xi ħaġa propju dwar il-jum li fih naqsam magħkom kitbieti u ħsibijieti.

Ismu

Is-Sibt huwa s-sitt jum tal-ġimgħa u ħa ismu mill-kelma Ebrajka shabbāt, "jum ta' waqfien, u għalhekk ta' mistrieħ". Fil-ġimgħa Lhudija, dan il-jum huwa s-seba' jum u huwa meqjus bħala festa kkonsagrata lil Alla, li fiha x-xogħol u l-attivitajiet kollha, bħal tisjir, kitba, użu tal-elettriku, sewqan, eċċetra ikunu sospiżi. Fl-ilsien Taljan, isem dan il-jum huwa Sabato, li bħal ilsienna ġej mill-isem Ebrajk. L-istess nistgħu ngħidu għal xi ilsna oħra bħalma huwa l-Ispanjol u l-Portugiż – Sábado, il-Franċiż -

Samedi, il-Pollakk – Sobota, kif ukoll ir-Russu li jsejjaħ lil dan il-jum subbota. Iżda fl-Ingliż isem jum is-Sibt, Saturday għandu oriġini oħra. Is-Sibt huwa msejjaħ għal Saturnu, l-alla Ruman tal-agrikultura u ż-żmien. Dan l-isem ġej direttament mill-Latin dies Saturni li jfisser il-Jum ta' Saturnu. L-għeruq ta’ dan l-isem derivat mill-alla Saturnu nsibuhom ukoll fl-ilsna oħra wkoll. Fl-Għarbi jissejjaħ as sabt u hawn naraw il-viċinanza ta’ isem dan il-jum fil-Malti, għax wara kollox, isem in-numri u isem il-jiem tal-ġimgħa aħna ħaddniehom mill-Għarbi.

Is-Sibt fil-fidi

Is-Sibt huwa il-jum qaddis għal-Lhud. Għall-Insara huwa lejlet il-jum qaddis tal-Ħadd u għall-Musulmani huwa l-għada tal-jum qaddis tagħhom. Fil-fidi Lhudija, is-Sibt huwa l-jum qaddisa tal-mistrieħ, li jiġi ċċelebrat minn ftit qabel inżul ix-xemx ta’ nhar il-Ġimgħa sa nżul ix-xemx ta’ nhar is-Sibt. Is-Sibt il-Lhud jiftakru li Alla straħ fis-seba' jum tal-Ħolqien u fil-ħruġ tagħhom mill-eżilju tal-Eġittu. Għalhekk il-Lhud jirritornaw mix-xogħol nhar ta’ Ġimgħa qabel tinżel ix-xemx biex jitolbu, jieklu, u jqattgħu ħin mal-familja. Għall-Insara s-Sibt mhux meqjus bħala jum qaddis iżda interessanti li l-Għasar (it-talb ta’ filgħaxija) tas-Sibt jissejjaħ bħala l-Ewwel Għasar tal-Ħadd, imbagħad il-Ħadd filgħaxija jsir it-Tieni Għasar. Biss lejlet l-Għid il-Kbir, jissejjaħ Sibt il-Għid huwa t-tieni jum mit-Tridu tal-Għid u huwa mħares b’qima kbira. Imbagħad hemm id-devozzjoni ta’ Marija f’jum is-Sibt. Din hija drawwa liturġika antika ħafna ta’ devozzjoni Marjana li tikkonsisti filli l-liturġija tas-sigħat tkun tal-Madonna u tista’ ssir quddiesa tal-Madonna wkoll. Interessanti wkoll li mbagħad il-quddiesa tas-Sibt filgħaxija tkun dik tal-għada u mhux ta’ dak il-jum stess. Dan minħabba d-drawwa antika li l-jum jibda ma’ nżul ix-xemx u mhux f’nofsillejl. Fl-Iżlam, is-Sibt ma għandux importanza speċjali. Filwaqt li l-Ġimgħa hija l-jum iddedikat għall-qima, is-Sibt jitqies bħala jum normali ta' fost il-ġimgħa.

Jum il-ħasla

Ħafna drabi s-Sibt niddedikawh għall-ħasil tal-ħwejjeġ, imma rridu niftakru li sa ftit għexieren ta’ snin ilu, meta l-kumdità fi djarna ma kinitx dik li hija llum u l-iġene lanqas kienet dik li għandna llum, ħafna kienu jieħdu l-banju nhar ta’ Sibt għax matul il-ġimgħa kienu jiddellku kif jistgħu. Kien żmien ieħor! U dan ara ma naħsbux li kien isir Malta biss. F’kulturi differenti bħal fil-pajjiżi Skandinavi, is-Sibt jissejjaħ lördag, lørdag, jew laurdag, bl-isem li ġej mill-kelma antika laugr jew laug, li tfisser banju. Għalhekk nindunaw li 'lördag' tfisser "jum tal-banju." Dan beda jissejjaħ hekk minħabba l-prattika tal-Vikingi li kienu jinħasslu nhar ta’ Sibt. L-isem għas-Sibt  għall-Maori, ġens indiġenu ta’ New Zealand, huwa Rahoroi, li litteralment ifisser Jum tal-Ħasil. Meta l-Maori kienu kkonvertiti għall-Kristjaneżmu, huma kienu jħallu s-Sibt biex jaħslu l-ħwejjeġ tagħhom u jilbsuhom indaf għall-knisja nhar il-Ħadd.

U iżjed

F’pajjiżna, elezzjoni ġenerali jew referendum isiru fil-jum tas-Sibt. Din il-ħaġa ma ssirx biss f’Malta imma anke fl-Awstralja kif ukoll fi New Zealand. Is-Sibt ukoll isir il-finali tal-Eurovision Song Contest. Semmejt dawn iż-żewġ avvenimenti għax għalina l-Maltin, kemm l-elezzjonijet kif ukoll l-Eurovision huma ħwejjeġ li nqisuhom “sagri”. Is-Sibt tard filgħaxija u matul il-lejl huma l-ħinijiet li l-biċċa l-kbira tal-bars, pubs, klabbs u ristoranti jkunu mimlijin bin-nies, għax is-Sibt filgħaxija huwa meqjus bħala l-aħjar ħin għall-ħruġ. Fuq kollox is-Sibt huwa l-ewwel jum ta’ tmiem il-ġimgħa.

L-irvellijiet tas-7 ta’ Ġunju, 1919 seħħew is-Sibt u l-għeluq tal-bażi Brittanika minn Malta, fil-31 ta’ Marzu 1979 kien is-Sibt ukoll.

Minbarra l-barijiet u r-ristoranti, is-Sibt filgħaxija huwa wkoll popolari għaċ-ċinema. Illum dan id-divertiment reġa’ ħa l-ħajja wara li għal xi snin kien donnu ntemm għal kollox. Fost il-films hemm xi wħud li f’isimhom għandhom il-jum tas-Sibt. Forsi l-aktar popolari huwa Saturday Night Fever, tal-1977, il-film mużikali klassiku taż-żfin b'John Travolta fil-parti ewlenija li ddefinixxa era tad-disco.

U ma’ dan kollu hemm ukoll dawn l-artikli fqajra tiegħi.

Fr Reno Muscat

Dan l-artiklu deher f'In-Nazzjon - 25 ta; Lulju 2026