Il-Kapitlu Ġerenali minn wara l-kwinti

            

Sirt naf li l-Kapitlu Ġenerali kien sejjer isir Ruma minflok l-Indja ftit wara li Fra Carlos Aspiros Costa, dak iż-żmien Majjistru Ġenerali tal-Ordni, minħabba diversi problemi u nkwiet fil-pajjiż kien iddeċieda li jinbidel il-post ta' dan il- Kapitlu Ġenerali. Kont Bologna, fejn qiegħed nistudja t-teoloġija meta smajt b' din l-aħbar. Xi wħud qalu li għandu mnejn li l-organizzaturi jkunu jeħtieġu l-għajnuna ta' xi studenti. Billi jiena nagħmel parti mill-Provinċja Dumnikana ta' Malta, lanqas biss qatt għaddieli minn moħħi li nista' nkun jiena wkoll li nagħti daqqa ta' id f' dan il-kapitlu. Ħsibt li kien sejjer ikun hemm biżżejjed studenti Taljani biex jagħmlu dan ix-xogħol.

Mill-kurja tal-Ordni waslet it-talba għal tliet studenti sabiex jgħinu fil-Kapitlu. Is-Surmast ta' Bologna talab tliet studenti li jkunu jafu jsuqu, jitkellmu bl-Ingliż u jkunu professi solenni. Intgħażilt jien u tnejn oħra. L-Ordni jagħtina saqaf fuq rasna, jagħtina l-ħtiġijiet tagħna ta' kuljum, iħallsilna l-istudji u dak kollu li nkunu neħtieġu, ikun jixraq li nagħtih xahar mill-vaganzi tiegħi. Għalhekk għidt lis-surmast sabiex jgħoddni ġewwa, kemm-il darba jaċċetta l-Provinċjal. Meta tkellimt mal-Provinċjal, mhux talli aċċetta iżda ħa gost u ħeġġiġni sabiex ma nitlifx din l-okkażjoni, okkażjoni ta' darba li mhux dejjem tkun possibbli. U hekk sibt ruħi fil-Kapitlu Ġenerali ta' Ruma.

  

Immexxija mis-segretarju tal-Kapitlu, P. Francesco Ricci OP, xogħolna kien li nkunu qribu għal dak li jista' jinqala'. Fra Matteo Montalcini OP ħa ħsieb is-sewqan. Li jkollok 172 persuna f' laqgħa, bilfors tkun trid lil xi ħadd isuq il-ħin kollu għax daqqa tonqos ħaġa u daqqa tonqos oħra u dejjem sejrin. Ix-xogħol tiegħi kien ġewwa l-uffiċċju, ngħin fl-organizazzjoni ta' kuljum, nieħu ħsieb id-dokumenti li minn ħin għall-ieħor kienu jidħlu fl-uffiċċju. Fra. Domenico Spadafora kien jagħmel xi xogħol ieħor li jinqala' matul il-jum. It-tlieta li aħna ppruvajna ngħinu biex il-kapitlu jimxi bla ebda nkwiet. Konna kemm stajna flessibli, Kien hemm fejn kelli nħalli l-uffiċċju u mmur insuq jien, filwaqt li Matteo gieli tana daqqa t' id fl-istampar tad-dokumenti li kienu jippreżentaw il-kummissjonijiet fi ħdan il-kapitlu. Konna wkoll nieħdu sehem fil-liturġija u fl-animazzjon tal-quddiesa ta' kuljum. Kien hemm jiem li spiċċajna bla nifs u konna mmorru lura l-Kunvent ta' Santa Sabina b'ilsiena barra, għejjenin imma kuntenti. Dan ma jfissirx li ma kellniex ukoll ħin noħorgu u nduru ftit il-belt sabiħa ta' Ruma, anzi kellna l-opportunità naraw ukoll il-periferija tal-Belt Eterna.

 

Ma nista' ninsa qatt din l-esperjenza unika. L-ewwel ħaġa minħabba li rajt b' għajnejja kif isir Kapitlu, kif jitla' Majjistru ġdid. Għallmuna dan kollu fin-novizzjat, imma meta tkun fil-post, tara b' għajnejk u tmiss b' idejk, huwa għal kollox differenti. L-istess bħal logħba futbol meta taraha fuq it televisjoni mhux bħal meta tkun il-grawnd. It-tieni ħaga għax stajt nara il-wiċċ universali tal-Ordni tagħna. Aħwa minn madwar id-dinja kollha lkoll taħt l-istess saqaf. Tant aħwa, tant ilsna, kulturi u etniċitajiet diversi, imma kollha b' ideal wieħed. U fl-aħħar nett minħabba l-għadd ta' ħbieb li kont naf u li iltqajna mill-ġdid u oħrajn ġodda li għamilt. Aħwa li għandna mnejn qatt aktar ma nerġgħu naraw wiċċ xulxin imma għal tliet ġimgħat ħdimna, dħaqna u għexna flimkien.

Hemm xi mumenti li jibqgħu żgur f moħħi. Il-liturġija sabiha. Il-quddiesa ta' kull filgħodu kienet tkun animata minn xi grupp differenti. Kienu jintużaw it-tliet ilsna uffiċċjali tal-Ordni, l-Ingliż, il-Franċiż u l-Ispanjol. Wieħed mill-isbaħ mument kienl-adorazzjoni u l-att penitenzjali li sar lejlet l-elezzjoni tal-Majjistru l-ġdid. Kienet xena kommoventi tara 172 Dumnikan, ilkoll flimkien, fejn wara l-adorazzjoni, kulħadd mar isib Dumnikan ieħor sabiex iqerr. Xena tassew kommoventi. Ftit bankijiet quddiemi kien hemm Fr. Carlos Aspiros Costa, kien l-aħħar jum tiegħu bħala Majjistru Ġenerali. Kien qiegħed iqerr għand patri Dumnikan żagħżugħ. Ħaġa oħra li ma ninsiex żgur huwa l-kant tas-Salve Regina u ta' O Lumen, żewġ talbiet li nkantaw aħna d-Dumnikani wara l-għasar. Kienet vera ħaga li kważi tqabbiżli d-dmugħ minn għajnejja x' ħin kont nara daqstant aħwa Dumnikani, minn daqstant pajjiżi, daqstant ilsna differenti, imma lkoll magħqudin f' talba waħda lil Sidtna Marija u lil Missierna San Duminku. Ħaġa oħra li ma ninsa qatt hija li kont qed naħdem daqshekk qrib il-Majjistru Ġenerali  l-ġdid. Fra Bruno Cadoré ġieli ġie ħdejja u kien jgħidli: 'Reno, għajjejt?'

Bruno Cadoré Majjistru tal Ordni tal-Predikaturi

Tassew inħossni kuntent li kelli din l-okkażjoni, din l-opportunità unika, għax minkejja li ma kellix vot, ma kellix vuċi fil-kapitlu, fl-istess ħin ma kontx barrani. Meta tkun fil-pożizzjoni li konna fija jien u sħabi tkun tista' tara l-kapitlu minn lenti differenti, tara l-kapitlu minn wara l-kwinti. Minn wara l-kwinti tkun tista' tara x' qed jiġri fuq il-palk kif ukoll x' ikun għaddej wara l-palk.

© Fr. Reno Muscat OP